الـ MTV عار على الوطن .. إقرأ لتعرف السبب !

الـ MTV عار على الوطن .. إقرأ لتعرف السبب !

زكريا فحام

 

بسمح لنفسي ولو للمرة الاولى اني أكتب مقال بالعامية ، يمكن بيوصل بطريقة أوضح وخاصة لبعض الناس اللي ما بجيدو الفصحى ، ويمكن بيوصل من القلب للقلب بطريقة أصدق بالتعبير ، بكل الاحوال مش مهم اذا كان اللي بدي اكتبو بالعامية او بالفصحة ، بالعربي او بالاجنبي ، الاهم من ذلك انو يوصل تيفهمو بعض الجهلة شو عم قول ، وبعض المبغضين شو نحكي ، وبعض المتفلسفين اللي عايشين على هامش الحياة شو عم بصير .

بالوقت اللي غابت فيه الدولة عن الناس وهي اساساً طول عمرها غايبة وما طالعلها حسّ ، في وقت الازمات ووقت المحن  الدولة بتختفي عن الانظار وبتسير تنظّر على المواطن من بعيد لبعيد على أساس هني كامشين زمام الامور .

بالوقت اللي انفقدت فيه الانسانية واحترام الذات والبشر ولدت محطة الـ MTV لتكون السباقة دايماً وهاي مش اول مرة لتعمل مبادرة انسانية بإمتياز وتوقف وقفة رجال حد خيها الانسان .

بزمن العهر الاعلامي والمسخرة والفلسفة والتنكيت والتهويل أثبت الـ MTV انها سيدة الموقف ، بالوقت اللي اعتبرو عدد من الجهلة بإنها عار على الوطن لانها عميلة .

اي نعم صح الـ MTV هي عار على الوطن يا جهلة لانها كانت اول من اطلق حملة التبرعات وقامت بمبادرة انسانية ما حدا تجرأ يقدم عليها .

  اي نعم صح الـ MTV هي عار على الوطن يا مبغضين لانها جنّدت عدد كبير من الاعلاميين ليتلقوا اتصالات للتبرعات من اجل مساعدة المستشفيات ودعمها ودعم صليب الاحمر والدفاع المدني والجمعيات الخيرية وغيرهن كتار

اي نعم صح الـ MTV هي عار على الوطن لانو صاحب المحطة شخصياً جنّد نفسه ليكون حاضر 24/7 ليطمئن على فريق العمل ويشرف على المبادرة الانسانية اللي بلشو فيها من لحظة الكارثة

اي نعم صح مش بس الـMTV عار كمان الاعلامي مارسيل غانم وفريق عمله عار لانو ابتسامتو بضل مرسومة على وجوه اللي بتعطينا امل وتفاؤل رغم وجعو العميق على وجع الناس

الـ MTV يا تتر يا أغبياء يا جهلة جمعت فوق ال25 مليار ليرة بالوقت اللي انتو عم ضيعو وقت بالاستهزاء والمسخرة وطق الحنك والتفكير الهمجي ، فيروس كورونا ضعيف جداً امام خطورة تفكيركن وجهلكن وما حدا غيركن انتو اللي بتفكرو بهمجية فيروس ومش عادي انتو فيروس خطير على المجتمع وعلى عيلكن وعلى وطنكن هيدا اذا كنتو بتعرفو شو يعني وطن

اخيراً وليس آخراً يا ريت كتار يتمثلو بالـ MTV ويعملو واحد بالمية من اللي عملتو بفترة وجيزة جداً ، مؤسسة متشرف فيها والوطن بيتشرف فيها ، وما في حدا حجمو بحجم الوطن بس الـMTV وبقولها بكل جرأة هي وحدها حجمها بحجم الوطن لانها استطاعت تقوم بمبادرة ما قدرت عليها الدولة من مية سنة .

الـ MTV واستاذ ميشال المر والاعلامي مارسيل غانم وكل عامل بالمؤسسة من الزغير للكبير اسمحولي ارفعكن القبعة وانحني امام تعبكن وجهودكن الجبارة والله يبارك فيكن وتبقوا منارة الشرق في كل العالم .

شكراً لكل انسان كان انسان وتبرع ولو بليرة وحدة المهم فكر انو يساعد خيو الانسان وخاصة بهل محنة الصعبة وليجعل الله اجركم في ميزان حسناتكم

شاهد أيضاً

ناجي طعمي يبدأ تصوير الفيلم السينمائي “أنت جريح”

ناجي طعمي يبدأ تصوير الفيلم السينمائي “أنت جريح”