بلال عبده يكتب.. كلنا كفار ونستاهل ضرب النار!

بلال عبده يكتب.. كلنا كفار ونستاهل ضرب النار!

- ‎فيأخبار الفن, مواضيع هامة

بقلم/ بلال عبده

ده مش عنوان أي كلام عشان يشدك تقرأ المقال، دي حقيقة فعلاً ( احنا كلنا كفار ) وبالمناسبة كمان كلنا بنفتخر بده.

مشكلتنا إننا عندنا شوية سطحية كده معجونة بحبة تخلف مدلوق عليهم شوية ضيق أفق، لو خدنا كل حاجة ببساطة هتلاقي الموضوع سهل جدا، دانت كمان هتلاقي مفيش موضوع أصلًا.

تعرف إني بحب موديل عربية جداً وهي بالنسبة لناس كتير مش حلوة ومش ماركة وماتتحبش، أهُم دول يتقال عليهم كفار، طب ازاي؟!.

آه كفار بالعربية دي لإنهم مؤمنين بغيرها، نيجي بقى للحاجات الأكبر من كده اللي بيحصل عليها مشاكل ولغط كتير، “الدين” أيا كان الدين بس فعلاً كل الأديان مظلومة مع صحابها، دين إلهي دين بشري كل الأديان بتدعو لقواعد ومباديء أساسية وفي ناس كتير مش منتمين لأي دين بيطبقوا المباديء دي من نفسهم، والناس دي في غالبيتهم مابيكونش عندهم مشكلة مع حد ف الرأي والرأي الآخر.

أما بقى أغلب أصحاب المعتقدات بالنسبالهم كلمة كافر دي كإنك بتحتقره أو بتغلط فيه، مع إن المسيحي فخور إنه كافر بالإسلام لإنه مؤمن بدينه، والمسلم فخور إنه كافر باليهودية لإنه مؤمن بدينه، وعلى فكرة لو سألت أهل العلم ف كل دين من دول هتلاقيه بيقولك إن ايمانك بدينك يعني كفرك بدين غيرك وإن من ثوابت ودلائل دينك أصلاً إنك لا تؤمن بدين غيره، وكل دين من دول كمان فيه طوائف ومذاهب.

بتلاقي جهادي بيكفر الإخواني ف الإسلام وكاثوليكي بيكفر الأرثوذوكسي ف المسيحية وهكذا.

أكيد مش هتمشي ف الشارع تكفر فلان وعلان عشان على غير معتقدك، أكيد مش كل مرة هتقابل البت مارينا هتقولها ازيك يا كافرة، ولا كل مرة هكلم صاحبي المسيحي اللي معايا هقوله فينك يا كافر، مع إنك ممكن تلاقي ناس بتهزر كده عادي وواخدين الموضوع بمنتهى البساطة وبيضحكوا.

انت مش هتعمل كده آه بس الأكيد إنك لما تتسأل عن فلان المختلف عنك ف معتقدك فأنت عارف إنه كافر مش محتاجين لا نزايد على بعض ولا نطبل لبعض، وفهمك للمعنى المظبوط والصحيح للكلمة مالوش علاقة بحد تاني يستخدمها لأغراض تانية.

انت مش مسئول عن اللي يقتل ويسحل ويعذب بحجة إنه فاهم غلط أو عنده موروثات عقيمة متخلفة بتقوله (الكافر مهدورٌ دمهُ) بصوت أحمد راتب ف فيلم الإرهابي.

انت كمان مش مطلوب منك لما تكون فاهم، إنك تمشي على كيف الثقافة العامة للمجتمع حتى لو غلط! لإن الفاهم دوره يفهّم الناس اللي مش فاهمة مش يمشي ورا فهمهم الخاطيء عشان هما أغلبية.

ارجع كده اقرأ الجملة دي تاني عشان مهمة .. ولا أقولك أنا هكتبهالك تاني “الفاهم دوره يفهّم الناس اللي مش فاهمة مش يمشي ورا فهمهم الخاطيء عشان هما أغلبية”.

آخر موقف حصل معايا كنت بعلق على مشهد من وجهة نظري فوضوي جداً وفيه شيء من الهمجية والمشهد ده بيحصل للأسف ف مكان مقدس، ولقيت حد بيرد عليا بمنتهى الغلظة ويقوللي: اسكت انت يا خريج المسارح ..!!

وكإنه بيشتمني يعني .. اهي دي نفس فكرة كلمة كافر لإن الأخ ده متربي على إن خريج المسارح دي شتيمة وأنا بالنسبالي فخور جداً بكلمة زي دي تتقال عليا.

الموضوع بسيط والله احنا بس محتاجين نوسّع الأفق شوية ونتعلم ونمنطق الأمور بدل ماناخد كل حاجة على عمانا ونردد وخلاص.

بالمناسبة الإرهاب صنيعة الأفورة، لإن الأفورة في الإيمان بأي شيء يؤدي للإرهاب، وأكتر داعم للإرهاب هو الفتي مع الجهل، هو اعتقادك بإنك وحدك تملك الحق المطلق، هو اعتقادك بإن الجنة اتعملت ليك لوحدك.

الإرهاب مش مرتبط بدين لا أرضي ولا سماوي، لكن مرتبط بعقيدة فاسدة وقناعة شخصية مستبدة.

كلنا كفار بس ده مايمنعش أبداً إن الكفار ببعض يتعاملوا ويتعايشوا مع بعض ويحبوا بعض وف بعض الحالات يتجوزوا بعض كمان على حسب شريعة الأديان، لكم كفركم ولي كفري  بالمناسبة صحيح الجملة دي لغويا ودينيا مفيش أي مشكلة منها خالص واسأل أهل العلم بردو، أنا بوضح بس علشان الناس اللي هتفتكر إني ناقشها من الآية القرآنية الكريمة ” لكم دينكم ولي دين”.

وبعدين احنا اتفقنا بقى إننا نفهم اللي مش فاهم مش نمشي ورا فهمه الخاطيء  لحقت تنسى ولا ايه؟.

شاهد أيضاً

مستشفى 57357 توقع بروتوكول تعاون مع الفنان مصطفى درويش

وقعت إدارة مؤسسة مستشفى سرطان الأطفال 57357، بروتوكول