الدكتور زياد بيطار لن تحكمونا بعد اليوم … مطمر سرار لن يمر‎‎

الدكتور زياد بيطار لن تحكمونا بعد اليوم … مطمر سرار لن يمر‎‎

- ‎فيمتفرقات

خطوة بألف ميل نحو عكارنا متل ما منريدها ومنتمنالها ومنشتغل كرمالها، عكار الانماء المتوازن، عكار النهضة، الصمود يلي ما بيوقف عند حد، هيدي الخطوة اعزائي  هي بكل بساطة انو بصمودنا وباصرارنا وتشبثنا بالقانون، رح نمنع بقوتكن وعزمكن وتوحدكن من تحويل عكار الى مزبلة وبالنسبة لسرار فهو  لأهل عكار وهيدا شأن داخلي وهني يلي بقرروا خصوصا اهالي القرى المحيطة بالمطمر،

يا معالي الوزير أكرم شهيب مبارح رفضت تسمع صوت الشعب من خلال مداخلة لإلنا بكلام الناس، بس اليوم فيك تسمع صوتن وتشوفن كتير منيح عم بقولولك: شو هل المطمر الصحي يلي رح تجيبوا لعنا ويلي بالناعمة رافضينوا وعرفنا شو صار بصحتن خلال هل عشرين سنة، شو هل مطمر الموت يلي بدك تعطينا ياه ما نحنا صرلنا سنوات عم نموت كاهالي القرى المحيطة بالمطمر

حتى بالموت ما بدك تعمل توازن، بأعلى صوتنا من قلك ما رح تقدر تقتل أطفالنا ونساءنا ومشايخنا وشبابنا نحن إلك بالمرصاد لن يمر المطمر مهما كان الثمن .

اعتماد اللامركزية الإدارية في كل المناطق هو الحل، وليش      ما بكون جزء من الحل ترحيل النفايات مؤقتاً ريثما يتم انشاء معامل فرز في كل المناطق؟ لأنو الكلفة عالية، هل هي أغلى وأهم من حياة الناس، أم ان 70 مليار دولار دين ما كانت كلفة على لبنان وسرقة ونهب المال العام بالنسبة لإلكن هي نعمة ومش نقمة، إذا كان هذا هو المعيار، فمنقلك بكل صراحة لن تحكمونا بعد اليوم .

ومش بإجتماعات بالسراي أو بمجلس النواب الممدد لنفسه رح نقبل أو نرضخ مع انن وحتى بإجتماعتن مختلفين ومننصحون بدل ما يجتمعوا مع بعض يشوفوا الشعب شو بدو المطمر لا كلياً ولا جزئياً رح يمشي .

منرجع منذكر قلنا لوزير الزراعة اكرم شهيب بكتاب يلي ارسلناه انو يتراجع عن قرار انشاء مطمر باسرار وانو الخطة كلها بتضرب مبدأ اللامركزية الادارية وبتخالف موضوع الانماء المتوازن، وذكرناه بأموال البلديات وخبرناه المخالفات يلي شابت الخطة قانونا” وشكلا” ومضمونا”.

قلنا اعطو البلديات حقها.. قدمنا مذكرات ربط نزاع للوزير بطرس حرب بصفته وزير الاتصالات و الوزير علي حسن خليل بصفته وزير المالية والوزير نهاد المشنوق بصفتو وزير الداخلية والبلديات وطالبنا بأموال البلديات يلي هي حق مشروع لكل بلدية من بلدياتنا… والاتجاه  اليوم بعدما تقدمنا بمذكرات ربط النزاع رح يعطوا البلديات جزء من حقا، من عام الفين وعشرة  لغاية  اليوم بدلا” من العام اربع وتسعين ولغاية اليوم والمبلغ هو=< 720 مليار ليرة من الصندوق البلدي المستقل و525 مليار ليرة من عائدات الهاتف الخلوي وبكل الاحوال منرجع منقول انو البلديات رح يرجعلها حقها  كامل متكامل غير منقوص

نحن معركتنا هي عدم تحويل عكار الى مزبلة ومن خلال ها التجربة الفريدة للمجتمع العكاري والهيئات الاهلية، وهيدي التجربة الفريدة بجهودنا وجهودكن رح تتحول لكرة تلج  تنهض عكار من الحرمان وتحطها على طريق الانماء المتوازن … وهون بوجه رسالة للجميع (لن نكون مكسر عصا من الان وصاعدا) …عكار بجهودنا جميعا رح تكون مثال يحتذى به للحراك الحضاري يلي بيوصّل مطالبنا الى شاطىء الامان ، ونحن منقول لكل يلي تخاذل وتقاعس وتآمر علينا (اغفر لهم  يا ابتاه لانهم لا يدرون ماذا يفعلون) لا شيء يعلو فوق صوت الشعب ونصرة المستضعفين العكاريين  يلي امتدت من عصور حتى تاريخ اليوم، هيدا اليوم هو مفصلي لانو (ما بعد اليوم لن يكون كما قبل)… لانو رح يسمعو صوتنا عم يصدح بأرجاء لبنان قولا منرفض نحن نموت… نحن بدنا الحضارة .. بدنا السياحة… بدنا الانماء .. نحن مصدر السلطات وفقا لمقولة جيشنا الباسل (الامر لنا) ..

أملنا بالإنتصار هو مؤكّد وهو بخدمة الكل من دون شماتة بحدا .. ورح يكون درس لكل مين آمن بقوته الذاتية.. ولكل مين آمن بخيرات عكار وبقرارها  الحر … ولكل مين آمن انو ممكن نصنع التغيير وانو مين ما اجتمع ضدنا من حكومة ومن سياسيين ارادتنا يلي هي ارادة الحق سوف تنتصر…

هنيئا لعكار لانها بتضامنكن رح ترفض ابتزاز سوكلين بنقل النفايات اليها بغية الربح المادي الوفير … هنيئا لعكار لانها رح تكون اقوى من سوكلين يلي البعض قال انها اقوى من الدولة … عكار رح تكون السد المنيع يلي بيوقف بوج جرافة سوكلين… ورح تعلّم الناس شو يعني الاستقلال الذاتي وشو يعني رفض المال يلي بكون على حساب صحة المواطنين لانو اهل عكار ما بعمرن بكونوا مرهونين لحدا …. كتير قليل بلبنان يقدر الشعب يفرض ارادته على حكام فاسدين مش شايفين  الا انو الشعب وسيلة لملىء جيوبهم وتحقيق مصالحهم المادية .. اليوم اهل عكار رح يبرهنوا انهن احرار .. ورح يوضعوا الحجر الاساس لتسكير الدكاكين ووقف نهب المال العام…

يا اهلي بعكار

مشوارنا طويل بس رح نكفيه بعد ملف النفايات في مطالب كتير رح نضل موحدين حولها لانو بالفعل نحن عكار ولعيونك توحدنا… رح نفرجي العالم انو الحراك الشعبي العكاري  رح يثمر نتائج مهمة …رح يوقّف المطمر ويوحّد اهل عكار يلي وقفوا وقفة رجال بوج اذية منطقتهن ورفضوا المطمر وطالبوا بحقوق بلدياتن ، وكمان رح يكفوا وانا متأكد من اهل بلدي… ومندعي جميع اللبنانيين يلي بيريدوا مصلحة هالوطن اعتماد النموذج الحضاري اللاطائفي والسلمي لابداء الرأي وتحويل لبنان الى دولة قانون ومؤسسات ترضخ لارادة الشعب وهو مصدر السلطات…وبتوجه للحراك الشعبي بلبنان وبقلن لكل الحملات توحيد الصوت بوصل لابعد مدى … وبس نشيل المصالح الخاصة عجنب ونشتغل للمصلحة العامة ساعتها بخافوا المسؤولين وبياخدو بعين الاعتبار مطالب الشعب المحقة … اهل عكار نسيوا المراكز… ما فكروا فيها اصلا فحموا منطقتهن وهيدا الوضع الصحيح … نضال اهل عكار مستمر ومنمد ايدينا لاهل الحراك الشعبي وكل من يريد مصلحة الوطن ومنقلن تعوا نشتغل سوا لصالح لبنان كامل متكامل الجيش اللبناني والقوى الأمنية عمادو والشعب صوتو

عشتم، عاشت عكار وعاش لبنان

رئيس التعاون الدولي لحقوق الإنسان

                           المحامي الدكتور زياد بيطارunnamed

شاهد أيضاً

لوس انجلوس تشهد على نجاحات ادم عفارة واحلام تؤكد ذلك!

يتابع المصمم العربي العالمي ادم عفار تحقيق النجاحات