بلال عبده يكتب: كلمة ف ودنكوا ضحكوني بعد إذنكوا “بيضة بمليون جنيه”.. فين المسلسلات يا بيه؟

بلال عبده يكتب: كلمة ف ودنكوا ضحكوني بعد إذنكوا “بيضة بمليون جنيه”.. فين المسلسلات يا بيه؟

- ‎فيأخبار الفن

بقلم/ بلال عبده

زمان كان في فنان كوميدي بيلقبوه بالأستاذ وبيقولوا على فنه كان زمن الضحكة الصافية النضيفة بدون ابتذال ولا اسفاف.

ومن وقت للتاني بعد الأستاذ كنا بنشوف بردو أعمال حلوة بنضحك فيها من قلبنا سواء كان فيلم ولا مسلسل، أعمال ف معظمها بتحترم عقولنا وبتطلع الضحكة فعلاً من جوانا بدون بذل مجهود سخيف عشان يضحكونا عافية، ومع التطور التكنولوجي الرهيب والعالم المفتوح العجيب كل حاجة اتغيرت “وللأسف حاجات كتير اتغيرت للأسوأ”، وكأننا أصبحنا مجرد آلات بتكتب وبتخرج وبتمثل من غير أي روح، ماتفهمش احنا بنطلع لقدام ولا بنرجع لورا.

كان في ناس لحد وقت قريب ويمكن لحد دلوقتي كمان بيتريقوا على أفلام زمان خصوصاً الكوميدية منها، بس لما فتحوا التليفزيون في رمضان ٢٠١٩ بقوا يسبحوا بحمد اسماعيل يس وفؤاد المهندس ومحمد عوض كمان.

الكوميديا ف مصر بقالها فترة واصلة لمرحلة غريبة عجيبة والله، مفيش مضمون مفيش موقف مفيش حوار بيتكتب يطلع من نقطة لنقطة ويخليني أعيش معاه وهو بيعلي سقف الايفيه بكل سلاسة، وكله كوم بقى والنجوم اللي طفحت علينا فجأة من العدم دي كوم تاني .. شوية شباب بيرموا شوية ايفيهات على حجم فلان ولدغة علان وصوت ترتان وبقوا يصنفوا على إنهم نجوم الكوميديا ف مصر والأعلى أجرا كمان، بس الأسخم والأدل لما تلاقي نجوم الكوميديا الحقيقيين هما كمان انجرفوا لنفس السكة دي.

أنا شخصيا مش عارف المشكلة فين؟!! يمكن هما لسه بيضحكونا بس أنا اللي بقيت نكدي ولا ايه، بس ازاي يا جماعة والله أبدا دانا فرفوش جدا، ماهو مش معقول أشوف واحدة مثلاً زي مي عز الدين بتعمل كوميدي وأضحك عليها، أكيد يبقى فيا حاجة غلط والله، أو أشوف واحد كل موهبته ف الحياة إنه بيئلش، مايعرفش حاجة عن التمثيل إلا رمي الايفيه، مش معقول بردو هستحمل أشوفه ف ٣٠ حلقة بيضحكني! أكيد المشكلة مش فيا، بس بردو المشكلة مش فيهم، المشكلة ف اللي فتح الباب لحاجات عمرها ما كانت فن ولا تمثيل ولا كوميديا ولا أي حاجة خالص.

احنا ازاي عملنا قيمة كبيرة اوي كده لحاجات مالهاش قيمة؟! نفسي حد يناقشني ف المقال ده بالذات عشان أنا برجي اللي كان فاضل طار هو كمان، يمكن أكون محتاج علاج عالجوني يااخوانا.

كلمة ف ودنكوا: اعتبروني زي ابنكوا ومابقتش عارف أضحك زي زمان .. هرجع وأقول الناس دي ١٠٠ فل و ١٠ وأنا اللي مزودها حبتين، بس يا ترى ايه اللي هيحصل تاني ف السنين الجايين قبل مايفقعولنا حاجات تانية غير الحاجتين المفقوعين ؟! أقصد المرارة والطحال طبعاً مش أي حاجة تانية يا حلوين.

شاهد أيضاً

رزان تحتفل بعيد الأضحى المبارك بثلاث حفلات ناجحة

احتفلت النجمة اللبنانية رزان بعيد الأضحى المبارك بثلاث